ముద్దుగారే యశోద ముంగిటి-mUDDU GARE yASHODA

ముద్దుగారే యశోద ముంగిటి

॥పల్లవి॥		ముద్దుగారే యశోద ముంగిటి ముత్యము వీఁడు తిద్దరాని మహిమల దేవకిసుతుఁడు
॥చ1॥		అంతనింత గొల్లెతల‌ అరచేతి మాణికము పంతమాడే కంసుని పాలి వజ్రము కాంతుల మూఁడులోకాల గరుడపచ్చఁబూస చెంతల మాలోనున్న చిన్నికృష్ణుఁడు
॥చ2॥		రతికేలి రుక్మిణికి రంగు మోవి పగడము మితి గోవర్ధనపు గోమేధికము సతమై శంఖచక్రాల సందుల వైడూర్యము గతియై మమ్ముఁ గాచేటి కమలాక్షుఁడు
॥చ3॥		కాళింగుని తలల పైఁ గప్పిన పుష్యరాగము యేలేటి శ్రీవేంకటాద్రి యింద్రనీలము పాలజలనిధిలోనఁ బాయని దివ్యరత్నము బాలుని వలెఁ దిరిగీఁ బద్మనాభుఁడు